ВО НЕГОТИНО СЕ ОДРЖА ВТОРИОТ ПО РЕД ТРАДИЦИОНАЛЕН ТУРНИР ВО РАКОМЕТ ЗА МЛАДИНСКИ ЕКИПИ ГЕНЕРАЦИЈА ДО 1999 ГОДИНА

Во организација на ракометниот клуб „ Вардар Неготино “ а со финансиска поддршка од општина Неготино, во саботата во спортската сала на СОУ „ Св. Кирил и Методиј “ се одржа вториот по ред традиционален турнир во ракомет за младински екипи – генерација до 1999 година. На овој турнир учество земаа 6 екипи од кои 4 екипи во машка конкуренција и две екипи во женска конкуренција. 

Во полуфиналето РК „ Вардар-Неготино “ со резултат од 21:12 го совлада РК “Торо-Спорт” од  Виница додека пак РК “Вардар-Бисинов” од Велес го совлада - РК “Валандово” со резултат од 22 :20. Во мечот за трето место помеѓу  РК “Валандово” - РК “Торо-Спорт” по одиграните пенали со еден гол разлика победи екипата на РК “Валандово” и го освои третото место на овој турнир. Во финалето силите ги одмерија домаќинот РК “Вардар-Неготино”  и РК “Вардар-Бисинов” од Велес, каде домаќинот со осум гола разлика го совлада својот противник и го осои првото место на турнирот. Во женска конкуренција во единствениот натпревар кој што се одигра во оваа конкуренција екипата на РКЖ “Вардар – Неготино” ја совлада екипата на ЖРК “Торо – Спорт” од Виница со резултат од 14:13. За најдобар стрелец на турнирот беше прогласен централниот бек на екипата на РК “Вардар-Неготино”, Драган Кузманов. Инаку, овој турнир се одржува во рамки на програмата на општина Неготино за поттикнување, поддршка и развој на младинскиот спорт во општината заедно во коорганизација со РК „ Вардар-Неготино “, а за најдобрите екипи и поединци на турнирот општина Неготино обезбеди дипломи и пехари, додека на останатите учесници им беа доделени благодарници за учество.