Груевски: “Ќе одговориме наскоро на меморандумот на Грција“

Владата наскоро ќе одговори на меморандумот за соработка кој на почетокот на месецов го доби од  Грција и содржината ќе биде јавна како што бил и предлогот од  официјална Атина, рече премиерот Никола Груевски одговарајќи му на пратеникот Андреј Петров од СДСМ на собраниската седница за пратенички прашања.

- Тој одговор ќе биде во склад со нашите досегашни ставови и позиции по ова прашање, ќе биде конзистентен, нема да биде променлив како вашите ставови и да ги менуваме секој месец. Тој ќе биде и во согласност со интересите на Република Македонија. Ќе одговориме наскоро, тогаш кога ќе оцениме дека е најсоодветно и онака како што е најдобро за интересите на Република Македонија, рече Груевски.

Петров смета дека изјаснувањето треба да биде побрзо зашто со неодговарањето на меморандумот од една страничка, како што рече, се создава недоумица дека Владата се колеба да ги прифати грчките црвени линии. Побара и одговор што подразбира иницијативата на еврокомесарот за проширување Штефан Филе за добивање датум за преговори со ЕУ во декември и решавање на прашањето за името во рана фаза од пристапните преговори.