КЛУБОТ НА МЛАДИ НЕГОТИНО СО ХУМАНИТАРНА АКЦИЈА

Клубот на млади на Црвен крст Неготино и оваа година продолжува со спроведување на проектите во рамки на програмата на хуманоста Црвен крст во акција- промоција на хумани вредности кои ги изработуваат во Неготино но и цела Македонија. Неготинските младинци од Црвениот крст денеска во еден од угостителските објекти во Неготино организираа дневна шема која имаше хуман карактер во која сите посетители имаа можност да уживаат во добра музика и добро друштво и расположение, а со плаќање на нивна порачка имаа можност да донираат и да ја покажат својата хуманост. Како што велат младите, собраните финансиски средства ќе бидат наменети за помош на семејство од село Криволак, на кого му се потребни финансиски средства за итна операција. Изминатата година за младинците од неготинскиот Црвен крст беше доста успешна бидејќи пехарот на хуманоста за најуспешен проект замина токму во нивни раце, а како што најавија и оваа година се подготвуваат за успешна реализација на голем број проекти.  Инаку, програмата Црвен крст во Акција- Промоција на Хумани Вредности (ЦКА-ПХВ) веќе 16 години претставува национална алатка за привлекување и задржување на волонтери во Црвениот крст. Истата се имплементира во сите Општински организации на Црвен крст и на годишно ниво обучува околу 1200 младинци, потенцијални волонтери во организацијата. Младите добиваат обука за вредностите на Црвениот крст, учат за културата како систем од вредности, за културата на дијалог како основен предуслов за градење на интеркултурно опшество.