Убедлива победа на Металург во Минск

Македонскиот ракометен шампион Металург е на прагот на најголемиот клупски успех во својата историја – пласман во четвртфиналето од Лигата на шампионите, откако доцна попладнево забележа победа на гостувањето во Минск против Динамо со 26:23.

Металург ја имаше контролата на играта и на резултатот од самиот почеток и не му дозволи на противникот да го загрози водството иако во еден период од второто полувреме играше и со тројца ракометари помалку.

Предводници во победата на нашата екипа беа Наумче Мојсовски со девет голови и Младен Ракчевиќ со седум реализации. Дарко Станиќ забележа 10 одбрани, додека Никола Митрески имаше четири успешни интервенции (еден седмерец).

Реваншот ќе се одигра на 23 март во Скопје во веќе распродадениот „СЦ Борис Трајковски“.