Христијаните го одбележаа Водици и во Неготино

Коле Симионов од неготинското село Црвени Брегови вчера најбрзо доплива до крстот кој се фрлаше во вардарските води кај Пепелишкиот мост. А покрај него десетина други христијани вчера скокнаа да го фатат крстот.

Симионов вели дека ова е петти пак да го фати крстот, а веќе осум години редовно е учесник во овој настан.

Од соверниците доби многу благослови и честитки, а од општината и од градоначалникот Ванчо Апостолов доби ЛЦД телевизор на подарок.

Притоа и градоначалникот Апостолов им го честита празникот на православните христијани и им посака здравје и среќа.

Фрлањето на крстот во Неготино секоја година се извршува на мостот на Вардар кој го поврзува Неготино со селото Пепелиште. Обичај е во следниот месец, најсреќниот којшто го фатил крстот, да помине во секоја куќа, а домаќините да му дадат пари со вера за здравје, мир, љубов и среќа.